دەقی وتاری بەرهەم ساڵح لەکۆنگرەی دامەزراندنی هاوپەیمانی

0

بەناوی خوای گەورەو میهرەبان
پێشەکی سوپاس بۆ متمانەی ئێوەی خۆشەویست..

سوپاس بۆ بڕوابوونتان بەوە کە بەندە بتوانێت بەرنامە و ئامانجی ئەم هاوپەیمانیە بۆ ئێوەی هاودید و بۆ کۆمەڵانی خەڵکی کوردستان جێبەجێبکەین. سوپاسی بێپایانم بۆ یەک بەیەکی کاندیدیەکان کە لەپرۆسەی هەڵبژاردنی سەرۆکی هاوپەیمانی بەشداربوون، دەستخۆشییان لێ دەکەم، ئەمەیە هاوپەیمانی، نەریتێکە کە ئەم هاوپەیمانیە واڵا و کراوەیە بۆ یەک بە یەکی هاوڵاتیانی ئەم نیشتمانە، بۆ گەنج و ژن و تێکۆشەرانی ئەم نیشتمانە کە پێشبڕکێ بکەن بۆ بەدەستهێنانی هەر پۆست و پلەیەک لەم هاوپەیمانیە و هیوادارم لە کۆنگرەکانی ئایندەدا خەڵکی تر و گەنجی تری ئەم وڵاتە بێنە پێشەوەو لەهەموو ئۆرگان و پلە و پایەکانی ئەم هاوپەیمانیە هاوکار و بەشدار بن. 

هاودیدانی خۆشەویست.. 
لەبری دەستەی دامەزرێنەری هاوپەیمانی، بەخێرهاتنی یەک بەیەکتان دەکەم، بۆ ئەم کۆنگرەیە، کۆنگرەی دامەزراندانی هاوپەیمانی. بەبیرتان دەهێنمەوە کە ئەم کۆنگرەیە لەماوەی 48 کاتژمێردا رێکخراوە. بۆ ئەوەی بەپێی رێکارە یاساییەکانی کۆمسیۆنی باڵا بتوانین مەرجەکان جێبەجێ بکەین. لە 48 کاتژمێردا هاوپەیمانی بتوانێت کۆنگرەیەکی وەها بکات، بزانین ئەم هاوپەیمانیە بکەوینە خۆ و خۆسازبدەین، دەتوانین ببینە پشت و پەنای خەڵکی کوردستان و ئاواتەکانی لە عەدالەت و دادپەروەری و حکومڕانی باش بەدی بهێنین. 

لەرێگەی ئێوەی خۆشەویستەوە سڵا و رێز و خۆشەویستی بۆ هاوڵاتیانی ئەم نیشتمانەمان دەنێرین. بۆ جوتیارانی سەربڵندی کوردستان و کرێکارانی هێز و بازووری بونیادنان و مامۆستایانی مەشخەڵ لەناو شەوەزەنگی نەزانیندا کە بەبێ موچەیی گەنجەکانی ئەم وڵاتەمان فێڕدەکەن و پەروەردە دەکەن. بۆ لاوان و خوێندکارانی ئەم نیشتمانە، بۆ ژن و خانمانی روو سووری ئەم نیشتمانە، سڵاو بۆ پێشمەرگە، سڵاو بۆ کەسوکاری سەربەرزی شەهیدان و ئەنفالکراوەکان. بۆ هاوڵاتیان لەهەر بستێکی ئەم نیشتمانە، لە زاخۆی دەلال، بۆ ئاکرێ و ئامێدی، بۆ دهۆکی خۆشەویست، بۆ باڵەکایەتی سەربڵند بۆ سۆران، بۆ شەنگالی بریندار، بۆ هەولێری قەڵاو منارە، بۆ کۆیەی حاجی و مەلای گەورە، بۆ رانیەی دەروازەی راپەڕین و قەڵادزێی ئازیز، بۆ کەرکوکی بێناز و چەوساوە، بۆ سلێمانی هەڵمەت و قوربانی، بۆ هەڵەبجەی شەهید و گەرمیانی خەبات و تێکۆشان و بۆ گەرمەسێر، بۆ چەمچەماڵی پایتەختی شەهیدان، بۆ رەشپۆشەکانی بادینان و بارزان و سمود و رزگاری، بۆ شۆڕش، بۆ یەک بەیەکیان سڵاو دەنێرین. سڵاوی گەرم و بەدڵێکی پڕ ئومێد و هیواوە، بۆ ئایندەیەکی باشتر و شایستەتر بەهاوڵاتیانی ئەم نیشتمانە. 

پەیامی خۆمانتان پێ ڕادەگەیەنن، پەیامی پێداگریی لەسەر کۆتاییپێهێنانی ئەم زوڵم و بێدادیەی ئەم وڵاتەی گرتووەتەوە. کۆتاییپێهێنان بەیارییکردن بەچارەنووسی ئەم میللەتە، کۆتاییهێنان بە بەهەدەردانی داهاتی ئەم نیشتمانە و بێبەشکردنی هاوڵاتییەکانی، پێداگریی لەسەر بەدیهێنانی دادپەروەریی و حکومڕانی باش و خۆشگوزەرانی. پێداگریی لەسەر پێکەوەژیان لەگەڵ پێکهاتەکانی ئەم نیشتمانە. لەمسوڵمان و مەسیحی و شەبەک و کاکەیی و هەموو پێکهاتەکانی تر. لەدڵەوە دووبارە سوپاسی ئەو متمانەیەتان دەکەم، ئەرکێکی قورسە، بەتایبەتی لەم قۆناغە هەستیارەی کە نیشتمانەکامانی پێدا تێدەپەڕێت، بەڵام دڵنیام پشتئەستوور بەخوای گەورە، بە وزەو توانای ئێوە، بەکۆمەڵانی خەڵکی کوردستان، پێکەوە دەتوانین وڵاتەکەمان لەم بێئومێدیی و بێهیواییە رزگار بکەین بەرەو هیواو ئایندەیەکی گەش، بەرەو حکومڕانییەکی باش و دادپەروەر بخەینە گەڕ. 

هاودیدانی ئازیز.. 
مایەی شانازیمانە ئەمڕۆ وا بەیەکەوە لە کۆنگرەی دامەزراندنی هاوپەیمانی دیموکراسی و دادپەروەری وەک رێکخستنێکی سیاسیی نوێ و دیموکراتی بۆ بەشداریی لەکایەی سیاسیی و مەدەنی و پەرلەمانی و حکومڕانی ئەم وڵاتە کۆبووینەتەوە. دووبارە سوپاس و پێزانینمان بۆ بەشداربوونی یەک بەیەکتان. سوپاس و پێزانیمان بۆ لیژنەی ئامادەکاری کۆنگرە کە توانی بە ماوەیەکی کورت و پوخت ئەم کارەمان بۆ ئەنجام بدات. سوپاس و پێزانینیشمان بۆ کۆمسیۆنی باڵای هەڵبژاردن کە دەمانەوێت بەرێکارە یاساییەکاندا بەتەواوی ئەرکەکانی خۆمان جێبەجێ بکەین.

هاودیدانی ئازیز.. هاوڵاتیانی نیشتمانەکەمان..
ئەم قەیرانە دژوارە کە بەرۆکی نیشتمانەکەمانی گرتووەتەوە، ئەنجامی کاری نەخشەڕێژکراوی کۆمەڵێک ناوەندی بەرژەوەندیخوازە، کە سەرەڕای شکستە گەورەو بەردەوامەکانیان، وێڕای نابوتبونیان لەبەڕێوەبردنی وڵات و نەمانی متمانەی هاوڵاتیان پێیان، کەچی ئێستاش بەردەوامن لەسەپاندنی قەڵەمڕەوی حزبی و بەردەوامن و لەبرابەشکردنی داهات و دەرامەتی ئەم نیشتمانە و لەسەر کۆمپانیای هاوبەش و پاوەنکردنی دەسەڵات و درێژەدان بە مەینەتی ئەم گەلە. تەکبیری ئێمەش هەموومان هاوپەیمانی بوو، نەک حزبێکی تەقلیدی، چونکە بڕوامان وایە، ئەرکی ئەم قۆناغە ئاڵۆز و سەختە، چارەی ئەم بارە سەختە بەتاکەک کەس و تاکە حزب و تاکە ناوچە جێبەجێ ناکرێت، بەڵکو رووبەڕووبوونەوەی ستەمکاریی و زوڵم و گەندەڵی و تۆڕی هاوبەشی پاوانکاریی، پێویستی بەهاوکاریی و هاوپەیمانی کەسان و لایەنی دیموکرات و دادپەروەرە. پێویستی بەیەکخستنی ئیرادەی راستەقینەی نوێبوونەوەو چاکسازییە.

هاوپەیمانی فۆڕمی تێکۆشانێکی نوێ و جیاوازە، بۆ ئەوەی گۆڕانکاریی و چاکسازیی راستەقینە بەدی بهێنێت، کە حزب و لایەنە تەقلیدییەکانی ئێستا وێڕای پاوانکاریی سیاسیی و دابڕکردنی ناوچەی نفوزی حزب و وێڕای ململانێی تەقلیدی کە زۆرجاریش بەداخەوە خوێناویی بووە، لەشەستەکانەوە درێژەی هەیە تا ئەمڕۆ، وڵاتەکەمانیان گەیاند بەم نەهامەتییەی کە ئەمڕۆ تێی کەوتووین. لەم پێناوەدا ئێمە هیوامان وایە بەفۆڕمی نوێ، بەفۆڕمی کارکردنی نوێ و هاوپەیمانی هاتووین بۆ ئەوەی هەوڵی یەکخستنی ماڵی کورد و چاککردنی حوکمڕانی خۆبەخۆی کوردستان سەربخەین کە لەنێوان بەرداشی ململانێی هێزە کۆنەکاندا شکستی هێناوە. هاتووین بۆ ئەوەی گەلەکەمان دوای نائومێدی، بەرەو هیوا و ئایندەیەکی گەش تاوبدەین. لەدوای مێژوویەک لەتاڵاوی دابەشکاریی، پاوانکاریی، ململانێی زبر و تەشهیر و تەخوین، کوردستان بەرەو ئاشتەوایی سیاسیی و کۆمەڵایەتی ببەین. کوردستان لەزوڵم و زۆر و ستەم و بێدایی بەرەو دادپەروەریی ببەین.

کۆنگرەی دامەزراندنی هاوپەیمانێتییەکەتان لەکاتێکدایە کێشە کەڵەکەبووەکانی نێوان حکومەتی هەرێمی کوردستان و حکومەتی فیدراڵ لەبەغدا، جارێکی تریش بەهۆی عینادی سیاسیی و لەشکرکێشی و بەکارهێنانی لۆژیکی هێز، گەیشتووەتە رادەیەکی پڕ مەترسی، بەتایبەتی لەدوای ریفراندۆم و کارەساتەکانی شانزەی ئۆکتۆبەر، دۆخەکە لەسەر هەموو ئاستەکان دژوار بووەتەوە. بەداخەوە سیاسەتی هەڵە، نەخوێندنەوەی واقعی سیاسەتی ناوخۆ و دەرەوەو سەرکێشی و بێباکیی لەبەرژەوەندیی گشتی و دەستێکەڵکردنی لەگەڵ نەیارەکانی گەل، کوردستانیان بەدۆخێکی نەخوازراو گەیاند و جارێکی تریش زیاتر لەنیوەی خەڵک و خاکی ئەم کوردستانە کەوتەوە قەدەری ناکۆکیی و ململانێوە. لەم چوارچێوەیەشدا دەڵێین، ناکرێت مامەڵە لەگەڵ پرسی رەوای کورددا لەپێگەی براوە، بەرامبەر بەدۆڕاوەوە بکرێت. مێژوو سەلماندوویەتی بەهێز و بەلەشکرکێشی هەرگیزاو هەرگیز مافەکانی گەلی کورد لەناو نابرێت. کورد ئەگەر لەرووی سەربازییشەوە توشی پاشەکشە ببێت، بەڵام خۆی کۆدەکاتەوەو عێراقیش توشی هەمان گێژاوی جاری جاران دەبێتەوە. مافی چارەنووس مافێکی ڕەوای خەڵکی کوردستانە، بەڵام ئەم مافە لەبەغدای پایتەختەوە بەدی دێت، نەوەک لەئەنقەرە و تاران و واشنتن. بەلێکتێگەیشتن لەگەڵ هاوکارەکانی ترمان لەعیراق بەدەست دێت نەوەک بەناکۆکی و لێکدابڕان. وەک کاری لەپێشینەش پێویستی بەچاکسازی سیاسیی ناوخۆیی و کۆتاییهێنان بەگەندەڵی و خزمخزمێنە و بەڕێوەبەردنی خراپی ئەم وڵاتە هەیە، کە بووەتە هەڕەشەیەکی گەورە لەسەر ئێستای کوردستان و بووەتە خۆرەی جەستەی حکومڕانی کوردستان.

هاوپەیمانی لەکۆنگرەی دامەزراندنیدا دوور لە موزایەدە، پێداگریی دەکاتەوە لەسەر حکومڕانی باش و دادپەروەر، پێداگریی دەکاتەوە لەسەر یەکخستنی خاک و خەڵک و ئەمن و ئاسایش و هێزی پێشمەرگەی کوردستان، بۆ ئەوەی دواجار کوردستانێکی سەقامگیر ببێتە مایەی خۆشگوزەرانی و ئاشتەوایی بۆ گەلی کوردستان و عیراق و ناوچەکە.

لەسەر ئاستی کوردستان ئەم حکومڕانییە شکستخواردووە، وێڕای ئەوەی ناتوانێت چارەکە موچەی فەرمانبەران و لانی کەمی خزمەتگوزاریی بۆ هاوڵاتیان دابینبکات، کەچی دەسەڵاتداران لەبری کۆتاییهێنان بەمۆدێلی شکستخواردوی حزبحزبێنە و خزمزمێنە، قەیران بەقەیران دەسپێرن. هەڵە بەهەڵە تێدەپەڕێنن و خەڵکی لەگێژاویی قەیران و برسێتی چەواشە و سەرگەردان دەکەن. ئێستاش بەداخەوە، مەترسی تەقینەوەی ناوخۆ لەئارادایە، کوردستان بەرەو مەترسی گەورەتری لەتبوون و دابەشبوون دەبەن. بەڵام بێگومان ئەمە کاری ئێمە لەهاوپەیمانی و هێزە چاکسازییخوازەکان سەختتر دەکات، بەڵام ناکرێت هاودیدانی خۆشەویست، هاوڵاتیانی کوردستان، ناکرێت لێگەڕێین هەر وا ئەم نیشتمانە مەحکومی سیاسیەتی هەڵە و چەوتی ئەم دەسەڵاتە بێباکە بێت.

واقع پێمان دەڵێت عیراق پێویستی بەپێداچوونەوەیەکی سەرتاسەری سیاسیی و ئابووریی و گشتگیر هەیە، کە بتوانێت چارەسەری کێشە بنەڕەتییەکانی حکومڕانی عیراق و پەیوەندی نێوان پێکهاتەکانی بکات و پێشبڕکێی ئابوریی و هەماهەنگی ئابوریی و خۆشگوزەرانیی گشت ناوچەکان بکاتە ئەڵتەرناتیڤ و بەدیلی پێکدادان و ململانێی سیاسیی، هەروەها بیکاتە بنەمای گشتی بۆ چارەسەری قەیرانەکانی عیراق. 

یەکێتی خاکی عیراق بەزەبر و زەنگ دابین ناکرێت. بە دیموکراسی و بەرژەوەندی هاوبەش و رێزگرتن لەمافە نەتەوەییەکانی گەلی کوردستان و مافە دیموکراتییەکانی گشت پێکهاتەکانی دیکەی عیراق دەکرێت. ئاسایشی ئەم ناوچەیە و ریشەکێشکردنی توندڕەویی پەیوەستن بەپەرەپێدانی ژێرخان و گەشەپێدانی پتەوی سەرجەم ناوچەکان، هەروەها لەنێوان عیراق و دەوروبەر و دراوسێکانی. بەمەش دەتوانرێت عیراق و کوردستانیش لەبری ئەوەی ببێتە رووبەری ململانێی و “الحرب الوکالە”ـی دراوسێکان و ناوەندە نێودەوڵەتییەکان، ببێتە رووبەری بەرژەوەندی هاوبەش و رووبەرووبوونەویە توندڕەویی.

کاتی خۆی لەراگەیاندنی یەکەمی هاوپەیمانی بۆ هەڵبژاردنەکانی پەرلەمانی کوردستان، وتمان هاوپەیمانی پاوانی هیچ لایەن و کەسێک نابێت. ئێستاش لەم کۆنگرەی دامەزراندنەدا جەخت دەکەینەوە، هاوپەیمانی موڵکی کەسێک نییە، موڵکی ناوچەیەک نییە، موڵکی لایەنێک نییە، ماڵی دیموکراسی هەمووتانە، لەناوچە جیاوازەکان، ئایدۆلۆژیا جیاوازەکان و پاشخانی سیاسیی و حزبی جیاواز، هی هەموو ئەوانەیە کە کۆکن، هاودەنگن، هاودیدن، لەسەر پێویستی بەدیهێنانی عەدالەت و دادپەروەردیی وەک بنەمای هەرە پێویستی حکومڕانی باش، دادپەروەریی بنەمای هەرە سەرەکیی حکومڕانی باش و تەندروستە. لەهیچ کوێیەکی دنیاشدا، لەهیچ کۆمەڵگایەکیشدا حوکمی زاڵم ناچێتە سەر. ئەم زوڵمەی لەم وڵاتە دەکرێت، لەهاوڵاتی ئەم وڵاتە دەکرێت، بەدڵنیاییەوە ناچێتە سەر، چارەسەری ئەمە بەدیهێنانی حکومڕانییەکی دادپەروەر و خزمەتگوزاری هاوڵاتیانی ئەم نیشتمانەیە. 

بۆیە من هیوادارم، هاودیدەکانیشم لەدەستەی دامەزرێنەر، کە پێکەوە ئەم قەوارەیەمان تۆمارکرد و ئێستا لەخزمەتی ئێوە پێشکەشی دەکەین، بەهیوای ئەوەین نەریتێک بسەلمێنین، کە ئەم هاوپەیمانیە هی ئێوەیە، بۆ ئەم خەڵکەیە، بۆ ئایندەی ئەم وڵاتەیە، هی کەسێکمان نییە، نەهی بەرهەمە، نەهی هیچ کەسێکی دیەکەیە، دەرگای واڵایە، بۆ یەک بەیەکی ئێوە، بەتایبەتی گەنجانی ئەم وڵاتە، کە نەک هەر ئەمڕۆیان لا مەبەستە، ئایندەشیان پەیوەستە بە چاکسازی و چاککردنی باری لاری حکومڕانی ئەم وڵاتە.

بوونی ئەم هەموو گەنجە لەکۆنگرەی دامەزراندنی هاوپەیمانیدا و بەتایبەتیش لەکاندیدکردن بۆ پۆستی سەرۆکی هاوپەیمانی، مایەی دڵخۆشی و گەشبینی راستەقینەیە. بێگومان قەدری تێکۆشەری دێرین و خەڵکی بەئەزموون گەورەیە، بەڵام لەسەدا 70ی ئەم کۆمەڵگایەی ئێمە خوار تەمەنی 30 ساڵە، گەنجی ئەم وڵاتە؛ سەرگەردانە، بێکارە، بێهیوایە، لەم هاوپەیمانییەوە بەڵێنتان دەدەینێ دەرفەتی کارکردن، دەرفەتی کارتێکردن لەبڕیارەکان و گەڵاڵەکردنی بەرنامەی ئەم هاوپەیمانیە بۆتان ڕەخساوە. دەمانەوێت ئەم هاوپەیمانێتییە ببێتە هەوێنی تواناسازیی و پەرەپێدانی توانا مرۆییەکانی گەنجانی ئەم وڵاتە. بۆیە لێرەوە لەڕێگەی ئێوەوە، بۆ تاک بەتاکی گەنجانی ئەم وڵاتە، پەیمای هەموومان فەرموو بەشداربن، وەرنە مەیدان، وڵاتی خۆتانە لێمەگەڕێن بەم جۆرە بەردەوام بێت، وەرن دەستلەناو دەست بۆ ئاراستەکردنی بەرەو ژیانێکی ئاسوودەو ئاشتەوایی و حکومڕانی باش. 

ژنان لەڕوانگەی هاوپەیمانییەوە هەر نیوەی کۆمەڵ نین، دایکم وتەنی، یادی بەخێر، دایکی نیوەکەی تریشن، لێرەوە هاوپەیمانی وێستگەی خەباتێکی نوێی هاوسەنگ و یەکسان دەبێت بۆ ژنان. هاوپەیمانی ستەمی سەر ژن وەک ستەمی سەر کۆمەڵگا سەیردەکات و بەپێی پەیڕەوی کۆنگرەی دامەزراندنی هاوپەیمانی، هەوڵی زۆمان بۆ ئەوەیە رێژەی هاوسەنگ رێژەی شایستە بێت، نەک رێژەی کۆتا. پێدانی دەرفەت و دابەشکردنی رۆڵ و رەچاوکردنی چونیەکی راستەقینە لەئەرک و ماف و بەرپرسیارێتییەکان، لەنێوان ژن و پیاو بۆ هاوپەیمانی و هاودیدەکانی بەرپرسیارێتییەکی دەستووری و یەکێکیشە لەتایبەتمەندییە جوانەکانی بنەما و پرەنسیپی و هاوپەیمانی.

بەدڵنیاییەوە هاودیدانی ئازیز ئەم گۆنگرەیە لایەنی پێویستی رێکارە یاساییەکانی کۆمسیۆنی باڵای هەڵبژاردنە، بەڵام پێویستە لێرەوە پێتان رابگەیەنین، لەماوەیەکی نزیکدا کۆنگرەیەکی دیکەمان دەبێت بۆ پێکهێنانی ئەنجومەنی گشتی و هەڵبژاردنی ئەنجومەنی بەڕێوەبەردنی هاوپەیمانی. سەرباری ئەوەش، ئەو دەقانەی سەبارەت بە پەیڕەوی ناوخۆ و پرۆژەی سیاسیی و پرۆگرامی حکومڕانی هاوپەیمانی کە لەبەردەستاندایە، تکامان وایە بەوردی بیخوێننەوە و تێبینی و سەرنجەکانتانی لەسەر گەڵاڵە بکەن بۆ ئەوەی لەکۆبوونەوەی ئایندەماندا بتوانین تێر و تەسەل باسی لێ بکەین و بتوانین بەتێبینی و سەرنجی و رەخنەو پێشنیازەکانی ئێوە دەوڵەمەندی بکەین. 
لێرەشەوە داواتان لێ دەکەین خۆتان ساز بکەن بۆ هەڵبژاردنەکانی ئایندە، چ لە کوردستان چ لەعیراق، بۆیە هەرکەسێک لەئێوە لەخۆی ڕادەبینێت و بەنیازە ببێتە پاڵێوراوی لیستی هاوپەیمانی بۆ هەڵبژاردنەکانی عیراق یاخود کوردستان، تکایە سی ڤی خۆتان بدەن بە دامەزراوەکانی هاوپەیمانی. مەبەستمانە لیستی هاوپەیمانی لەڕووی جۆرییەوە، لەرووی توانا و بەهرەوە، لیستە نایابەکان بێت، دەرفەتی خزمەتکردن و بەشداربوون لەکایەی سیاسیی ئەم وڵاتە، لەچنگی پاوانخوازیی لایەنەکانی دیکە رزگار بکات، فەرموون وەرنە مەیدان.

سەبارەت بەهەڵبژاردنەکان، پێداگریی دەکەین لەسەر هەڵبژاردنی پاک و بێگەرد، دوور لەتەزویر، پاککردنەوەی تۆماری دەنگدەران و زامنکردنی دەستاودەستکردنی دەسەڵات لەڕێگەی سندوقی هەڵبژاردنەوە، لایەنی کەمی چاوەڕوانی هاوڵاتیانی ئەم نیشتمانەیە. دەنگەکانیشمان مەدزن، دەنگەکانیشتمان زەوت مەکەن. بۆیە تکام وایە هەموومان بەورییاەوە لەگەڵ ئەم پرسە مامەڵە بکەین و بەشداربین لەکایەی سیاسیی و لەهەڵمەتی هەڵبژاردن، هەروەها هەر لە ئێستاوە بۆ ناساندن و ئاشناکردنی خەڵکی کوردستان بەبەرنامەکانی هاوپەیمانی هەڵمەتی ماڵ بەماڵ دەستپێبکەن. خەڵک تێبگەینن لەئامانج و بەرنامە و هیواکانی ئەم هاوپەیمانیە. لەدڵەوە دەیڵێم، ئەم هاوپەیمانیە بۆ ئێوەیە، هێزی ئێوەیە، دەنگی ئێوەیە و ئیرادەی ئێوەیە، چەتری بێ جیاوازیی کۆکردنەوەی هەمووتانە بۆ گۆڕینی واقعی بیدادیی ئێستا و دەستەبەرکردنی سبەینێیەکی روونتر و باشتر بۆ خۆتان و نەوەکانتان.

لە هاوپەیمانی کۆببنەوە بۆئەوەی پێکەوە بەهاکان بگەڕێنینەوە. ژیانی نوێ دەسپێبکەین، سەردەمی نوێ بنیاتبنێین ، حوکمڕانیەکی نوێ بەفۆرمی هاوپەیمانی نوێ بکەین. بە دلنییاوە کاریکی سەختە و رووبەررووی ئاستەنک و کیشە و بەربەرەکانی زۆر ئەبینەوە، ویرانکاریەکە بنەرەتیە و کێشەکان کەلەکە بوون، بەلام ناکری بی هیوابین، بەلی سەختە بەلام پیکەوە دەتوانین بە ئاراستەی دادپەروەری و حوکمڕانی باش بکەوینە ڕێ، سەختە بەڵام دەتوانین پیکەوە دەتوانین بەسەر ئەم زولم و بدادەدا سەربکەوین.

خوای گەورە لە قورئانی پیرۆز ئەفەرموی ((ؤقُلِ اعْمَلُوا فَسَيَرَي اللَّهُ عَمَلَكُمْ ؤرَسُولُهُ ؤالْمُؤْمِنُونَ))، با بکەوینە کار، بە کردەوە، نەک بە قسە و دروشم ، بە کردار،  پیکەوە ئێمەو ئێوەو هەمو خەڵکی ئەم نیشتمانە سرودەکە جوانەکەی ” خوایە وتەن ئاواکەی بەدەنگی زوڵاڵ و دڵی خۆش ودەرونی ئاسودەوە بڵێینەوە..” پێکەوە روەو سەرکەوتن، بە کردار بە کاری دڵسۆز و پەرۆشی بۆئاوادانی نیشتمان و سەرفرازی گەل و هاوڵاتیان. ئەرکەکەمان ڕێگەکەمان دژوارە ، بەلام پیکەوە دەتوانین بکەوینە ڕوەو چەسپاندنی دادپەروەری و کۆتاییهینان بە زوڵم وستەم و بێدادی.

 سەختە بەڵام پێکەوە دەتوانین
هەر شادو سەرکەوتو سەربەرز بن
 

ئەم وتارە دەربڕی رای نوسەر خۆیەتی و ناوين لێی بەرپرسیار نییە

بڵاوکردنەوە لە

بۆچوونێک بنووسە