بۆ لە بەرەى ” بەڵێ” بۆ ڕیفراندۆمین ..؟

0

هەڵوێست میرانى

پرسى ریفراندۆم و سەربەخۆیی پرسێکى نیشتیمانى و نەتەوەیی یە, ئامانجى شۆڕش و راپەرینەکانى کورد تەواوى ئەو قوربانیانەى دراون لە پێناو مافى چارەى خۆ نووسین بووە, کەواتە ئەو پرسە خەونى لە مێژینەى کورد بووە بۆ رزگار بوون لە ژێر دەستەیی و پارچە بوونى خاک و نیشتیمانەکەى.

چەند رۆژێک لەمەو بەر وادەى ریفراندۆم دیارى کرا و بریارە لە ٢٥ى سیپتەمبەرى ئەمساڵ پرۆسەکە ئەنجام بدرێ, وەک هەلومەرجێکى لە بار بۆ ئەنجامدانى پرۆسەکە, کە دەبینین گۆرانکاریەکان خێران و لە ئەنجامى شلەژانى دۆخی سیاسى ناوچەکە چەند وڵاتێک بە عەمەلى سەروەریان لە دەست داوە, لەوانە سوریا و یەمەن و لیبیا و تا ڕادەیەک عێراقیش, کە ئەگەرى زۆرە بارودۆخەکە دواى داعش بە ئاقارى لێکترازانى چەند ولاتیک هەنگاو بنێ و نەخشەى رۆژهەڵاتى ناوین سەرلەنوێ دابرێژرێتەوە..

ئەگەرچى پرۆسەى ریفراندۆم هاونیشتیمانیانى بۆ دوو بەرە دابەش کردووە, بەرەى “بەڵی” کە دەنگى زۆرینەى هاونیشتیمانیانە لە بەرامبەردا دەنگى “نەخێر” وجودى هەیە,دەنگى نەخێر دەگەرێتەوە بۆ بەشدارى نەکردنى بزووتنەوەى گۆڕان و کۆمەڵی ئیسلامى لە کۆبوونەوەى لایەنە سیاسیەکان و لایەنگرانیان وا بەستەن بەو بیانوانەى ئەو دوو حزبە لە راگەیاندنەکان و سۆشیال مێدیا پەخشى دەکەن, ئەگەرچى دەنگی نەخێرى هاونیشتیمانیان نەبەستراوەتەوە بە خەمخۆرىان بۆ مانەوە لەگەڵ عێراق کە مێژوو شاهێدى تەواوى مەینەتى و دەردەسەرى و کوشت و بڕ و ئەنفال و کیمیا بارانى گەلى کوردە لە لایەن دەسەڵاتدارانى پێشووى عێراق و دواجار موچە بڕین و دەرگا کردنەوە بۆ تیرۆریستانى داعشى هاتە سەر.

ئەوەى کورد بە عێراق دەبەستێتەوە لایەنى ئابوورى و ئاسایشە کە خۆى دەبنێتەوە لە بودجە و پەیوەندی سەربازى نێوان هەردولا , دەبینین ماوەى ٣ ساڵە بەهۆى برینى بودجە و موچەوە لە لایەن حکومەتى عێراقەوە کوردستان تووشى قەیرانێکى قوڵى دارایی بووە, لە رووى سەربازیشەوە حکومەتى ناوەندى ئامادە نەبووە ئەو گرێبەستانەى بۆ کرینى چەک ئیمزاى کردووە پشکى پێشمەرگە بدات, کەواتە گرێبەستى مانەوەى کورد لەگەڵ عێراق هەڵوەشاوەیە و تەنیا هەنگاوى عەمەلى ماوە تا بە فەرمى کۆتایی پێ بهێنرێ.

دەنگى “بەڵێ” ی ئێمە بۆ بەدیهینانى خەونى لە مێژینەیە و رزگاربوونە لە جەهەننەمێک کە ناوی عێراقه, مێژوو پێمان دەڵێ لەو کاتەى هاتۆتە وجود ئارامى و سەقامگیرى بەخۆیەوە نەبینیوە, دەنگى “نەخێر” پێکهاتووە لەو خەڵکە دڵسۆز و نیشتیمان پەروەرەى رەنجاون و هۆکارگەلێک ناچارى کردوون ئەو بریارە بدەن.
پێش ئەوەى بگەینە ٢٥ ى سیپتەمبەر ئەوەى گرینگ و پێویستە بکرێ هێنانى بزووتنەوەى گۆڕان و کۆمەڵی ئیسلامیە بۆ ناو بازنەکە و داخوازیەکانیان بەهەند وەرگیرێ, بەرەى دەنگى “نەخێر” کەمکرێتەوە و قەناعەت بەو بەرەیە بکرێ هەڵوێستیان بگۆڕن و لەو پرسە نیشتیمانى نەتەوەییە بە بەڵی دەنگ بدەن..

بڵاوکردنەوە لە

بۆچوونێک بنووسە